The Arab World

Latest topics

» Course Book الكتاب الخاص بالكورس
Tue Jan 08, 2013 12:51 am by Meeno1

» كلمات فرنسية من الحياة اليومية مترجمة إلى العربية
Wed Jul 27, 2011 9:55 pm by 3lia2 3li

» Lesson Two الدرس الثانى
Tue Jul 26, 2011 10:01 am by 3lia2 3li

» دورة ICDL مبسطه
Thu Feb 03, 2011 3:45 am by not happy

» فيديوهات دكتور إبراهيم الفقى كاملة
Sun Oct 17, 2010 3:06 am by Mohamed Selim

» Lesson Seven الدرس السابع
Tue Oct 05, 2010 1:33 am by Dr.Ruba

» All Medical Rep And Supervisor Pharmaceutical Companie PMR
Thu Aug 12, 2010 5:39 am by drphtarek

» Lesson One الدرس الأول
Fri Jul 23, 2010 12:15 am by love bird

» ترحيب بالأعضاء الجدد فى منتدى العالم العربى
Thu Jul 22, 2010 11:49 pm by love bird

» ما هو الحيوان الذى تخافه الجن
Wed Jul 14, 2010 2:32 am by saouaa

» Greetings and Courtesies : التحية و المجاملات
Fri Jun 11, 2010 5:50 am by Mohamed Selim

» شكر خاص لكل اللى ساهموا فى نجاح هذا الكورس التعليمى
Thu Jun 10, 2010 2:14 am by emy

» ألغاز العالم العربى
Thu Jun 10, 2010 2:07 am by Mohamed Selim

» بإمكان مصر انت تصبح اغنى دول العالم واغنى من دول الخليج . بحث للدكتور نادر نور الدين
Mon Jun 07, 2010 3:24 am by Mohamed Selim

» زوج يرسل إيميل بالغلط
Wed Jun 02, 2010 7:33 pm by Mohamed Selim

» عناوين شركات البترول فى مصر
Mon May 17, 2010 1:42 am by emy

» Lesson Four الدرس الرابع
Sat May 15, 2010 11:15 pm by emy

» دكتور إبراهيم الفقى - سلسة قوة الثقة بالنفس
Sat May 15, 2010 2:35 pm by ساره

» مقياس الحقيقة
Thu May 13, 2010 7:32 pm by planner

» نكت جااااااااااااامدة
Thu May 13, 2010 1:16 pm by Mohamed Selim

October 2017

MonTueWedThuFriSatSun
      1
2345678
9101112131415
16171819202122
23242526272829
3031     

Calendar Calendar

Who is online?

In total there is 1 user online :: 0 Registered, 0 Hidden and 1 Guest

None


[ View the whole list ]


Most users ever online was 20 on Wed May 05, 2010 3:47 am

The Arab World

free counters

    رباعيات الشاعر صلاح جاهين

    Share
    avatar
    Mohamed Selim
    Admin

    Posts : 106
    Join date : 2010-04-25
    Age : 30
    Location : Egypt

    رباعيات الشاعر صلاح جاهين

    Post by Mohamed Selim on Tue May 04, 2010 12:43 pm






    خرج ابن آدم من العدم قلت : ياه

    رجع ابن آدم للعدم قلت : ياه

    تراب بيحيا ... وحي بيصير تراب

    الأصل هو الموت و الا الحياه ؟

    عجبي !!!


    ضريح رخام فيه السعيد اندفن

    و حفره فيها الشريد من غير كفن

    مريت عليهم .. قلت يا للعجب

    لاتنين ريحتهم لها نفس العفن

    عجبي !!!


    ياما صادفت صحاب و ما صاحبتهمش

    و كاسات خمور و شراب و ما شربتهمش

    أندم علي الفرص اللي انا سبتهم

    و الا علي الفرص اللي ما سبتهمش

    عجبي !!


    و الكون ده كيف موجود من غير حدود

    و فيه عقارب ليه و تعابين ودود

    عالم مجرب فات و قال سلامات

    ده ياما فيه سؤالات من غير ردود

    عجبي !!!


    أنا شاب لكن عمري ألف عام

    وحيد لكن بين ضلوعي زحام

    خايف و لكن خوفي مني أنا

    أخرس و لكن قلبي مليان كلام

    عجبي !!!!


    يا باب يا مقفول ... إمتي الدخول

    صبرت ياما و اللي يصبر ينول

    دقيت سنين ... و الرد يرجع لي : مين ؟

    لو كنت عارف مين أنا كنت أقول

    عجبي !!!


    أحب أعيش ولو في الغابات

    أصحي كما ولدتني أمي و ابات

    طائر .. حوان.. حشرة .. بشر ..بس أعيش

    محلا الحياة.. حتي في هيئة نبات

    عجبي !!


    سهير ليالي و ياما لفيت و طفت

    و ف ليه راجع في الضلام قمت شفت

    الخوف ... كأنه كلب سد الطريق

    و كنت عاوز أقتله .. بس خفت

    عجبي !!


    كان فيه زمان سحليه طول فرسخين

    كهفين عيونها و خشمها بربخين

    ماتت لكين الرعب لم عمره مات

    مع إنه فات بدل التاريخ تاريخين

    عجبي !!


    عجبتني كلمة من كلام الورق

    النور شرق من بين حروفها و برق

    حبيت أشيلها ف قلبي .. قالت حرام

    ده أنا كل قلب دخلت فيه اتحرق

    عجبي !!!


    رقبه قزازة و قلبي فيها انحشر

    شربت كاس و اتنين و خامس عشر

    صاحبت ناس م الخمرة ترجع وحوش

    و صاحبت ناس م الخمرة ترجع بشر

    عجبي !!!!


    ليه يا حبيبتي ما بيننا دايما سفر

    ده البعد ذنب كبير لا يغتفر

    ليه يا حبيبتي ما بيننا دايما بحور

    أعدي بحر ألاقي غيره اتحفر

    عجبي !!!


    ورا كل شباك ألف عين مفتوحين

    و انا وانتي ماشيين يا غرامي الحزين

    لو التصقنا نموت بضربة حجر

    و لو افترقنا نموت متحسرين

    عجبي !!!


    نوح راح لحاله و الطوفان استمر

    مركبنا تايهه لسه مش لاقيه بر

    آه م الطوفان وآهين يا بر الأمان

    إزاي تبان و الدنيا غرقانه شر

    عجبي !!


    علي رجلي دم .. نظرت له ما احتملت

    علي إيدي دم.. سألت ليه ؟ لم وصلت

    علي كتفي دم.. و حتي علي رأسي دم

    أنا كلي دم .. قتلت ؟ ..... وألا اتقتلت

    عجبي !!


    انا كل يوم أسمع ........ فلان عذبوه

    أسرح في بغداد و الجزاير واتوه

    ما أعجبش م اللي يطيق بجسمه العذاب

    و اعجب من اللي يطيق يعذب أخوه

    عجبي !!!


    ينبوع و في الحواديت أنا سمعت عنه

    إنه عجيب .. و ف وسط لهاليب لكنه

    شقيت كما الفرسان طريقي .. لقيت

    حتي الخنازير و الكلاب شربوا منه

    عجبي !!!!







    .
    avatar
    Mohamed Selim
    Admin

    Posts : 106
    Join date : 2010-04-25
    Age : 30
    Location : Egypt

    Re: رباعيات الشاعر صلاح جاهين

    Post by Mohamed Selim on Mon May 10, 2010 8:14 am






    يا قرص شمس ما لهش قبة سما

    يا ورد من غير أرض شب و نما

    يا أي معني جميل سمعنا عليه

    الخلق ليه عايشين حياه مؤلمة

    عجبي !!!


    شاف الطبيب جرحي وصف له الأمل

    وعطاني منه مقام يا دوب ما اندمل

    مجروح جديد يا طبيب و جرحي لهيب

    ودواك فرغ مني .... و إيه العمل

    عجبي !!!


    أعرف عيون هي الجمال و الحسن

    و اعرف عيون تاخد القلوب بالحضن

    و عيون مخيفة و قاسية وعيون كتير

    وباحس فيهم كلهم بالحزن

    عجبي !!


    إيش تطلبي يا نفس فوق كل ده

    حظك بيضحك و انتي متنكده

    ردت قالت لي النفس : قول للبشر

    ما يبصوليش بعيون حزينة كده

    عجبي !!


    إقلع غماك يا تور وارفض تلف

    إكسر تروس الساقية و اشتم وتف

    قال : بس خطوة كمان .. وخطوة كمان

    يا اوصل نهاية السكة يا البير تجف

    عجبي !!!


    يا حزين يا قمقم تحت بحر الضياع

    حزين أنا زيك و إيه مستطاع

    الحزن ما بقالهوش جلال يا جدع

    الحزن زي البرد ... زي الصداع

    عجبي !!!!


    في يوم صحيت شاعر براحة و صفا

    الهم زال و الحزن راح و اختفي

    خدني العجب و سألت روحي سؤال

    أنا مت ؟ و لا وصلت للفلسفة

    عجبي !!!


    الفيلسوف قاعد يفكر سيبوه

    لا تعملوه سلطان و لا تصلبوه

    ما تعرفوش إن الفلاسفه يا هوه

    اللي يقولوه بيرجعوا يكدبوه

    عجبي !!!


    علي بعد مليون ميل من أرضنا

    من الفراغ الكوني بصيت أنا

    لا شفت فرق بين جبال و بحور

    و لا شفت فرق ما بين عذاب أو هنا

    عجبي !!


    إنسان أيا إنسان ما أجهلك

    ما أتفهك في الكون و ما أضألك

    شمس وقمر و سدوم و ملايين نجوم

    و فاكرها يا موهوم مخلوقه لك

    عجبي !!


    نظرت فوق للنجوم و انا ساير

    رجليا عترت في الحفر و الحجاير

    بقيت أقول و انا ع التراب: يا سلام

    مش بس عبره أخذت لكن عباير

    عجبي !!!


    - يا نجم .. نورك ليه كده بيرتجف ؟

    هو انت قنديل زيت ؟ أو تختلف

    - أنا نجم عالي .. بس عالي قوي

    و كل ما انظر تحت اخاف انحدف

    عجبي !!!!


    السم لو كان في الدوا منين يضر ؟

    و الموت لو عدونا .. منين يسر؟

    حط القلم في الحبر و اكتب كمان

    .. و العبد للشهوات .. منين هو حر؟

    عجبي !!!


    وقفت بين شطين علي قنطــــــــــــــــــرة

    الكدب فين و الصدق فيـــــــــــن يا تري

    محتار ح اموت .. الحوت خرج لي وقالي

    هو الكلام يتقــــــــــــاس بالمســـــــــــطرة

    عجبي !!!


    سرداب في مستشفي الولاده طويل

    صرخات عذاب ورا كل باب وعويل

    .. وفي الطــــــريق متزوقين البنات

    متزوقـــــــــــــين للحب و المواويل

    عجبي !!


    الدنيا أوده كـــــــــــبيره للانتظار

    فيها ابن أدم زيه زي الحـــــــمار

    الهم واحد .. و الملل مشــــــترك

    و مفيش حمار بيحاول الانتـــــحار

    عجبي !!







    .
    avatar
    Mohamed Selim
    Admin

    Posts : 106
    Join date : 2010-04-25
    Age : 30
    Location : Egypt

    Re: رباعيات الشاعر صلاح جاهين

    Post by Mohamed Selim on Wed May 12, 2010 11:02 am






    أيوب رماه البين بكل العـــــــــلل

    سبع سنين مرضان وعنده شلل

    الصــــبر طيب .. صبر أيوب شفاه

    بس الأكـــــــــاده مات بفعل الملل

    عجبي !!!


    نسمة ربيع لكن بتكوي الوشـــــــوش

    طيور جميلة بس من غير عشـــوش

    قلوب بتخفق إنما وحـــــــــــــــــدها

    هي الحياه كده .. كلها في الفاشوش

    عجبي !!!!


    يا طير يا عالي في الســــــما طظ فيك

    ما تفتكرشي ربنا مصطــــــــــــــــفيك

    برضـــــــــــك بتاكل دود و للطين تعًًًًودً

    تمـــــــــص فيه يا حلو .. و يمص فيك

    عجبي !!!


    كروان جريح مضروب شعاع م القمر

    سقط من السموات فؤاده انكســـــــــر

    جريت عليه قطه علشان تبلعـــــــــــه

    أتاريه خيال شعراء و مالهـــــوش أثر

    عجبي !!!


    ياللي نصحت الناس بشــــــــــــــرب النبيت

    مع بنت حلوه .. وعود , وضحك , وحديت

    مش كنت تنصحهم منين يكســــــــــــــــبوا

    تمن ده كله ؟ ... و الا يمكن نســـــــــــيت

    عجبي !!


    ما حد في الدنيا واخد جزاتــــــــــــــــــه

    و لا حــــــــــــــــد بيفكر في غير لذاذاته

    ما تعرفيش يا حبيبتي .. أنا و انتي مين؟

    إنتي عروس النيل ... و أنا النيل بذاته

    عجبي !!


    رقاصه خرسا و رقصه من غير نغــم

    دنيا . . يا مين يصالحها قبل النـــــدم

    ساعتين تهز بوجههـــــــــــــــا يعنـي

    يترجرجوا نهديها يعني نعـــــــــــــــم

    عجبي !!!


    إخطفني ياللي تحبني ع الحصان

    الدنيا قالت يوم في ماضي الزمان

    إخطفني ياللي تحبني ع الـــــفرس

    الدنيا قالت .. قام خطفها الشيطان

    عجبي !!!!


    من بين شقوق الشيش و شقشقت لك

    مع شهقة العصافير و زقزقـــــــت لك

    نهار جديد انا . . قوم نشوف نعــمليه

    انا قلت يا ح تقتلني .. يا ح اقــــــــتلك

    عجبي !!!


    جالك أوان ووقفت موقف وجـــود

    يا تجود بده يا قلبي يا بده تجــــود

    ما حد يقدر يبقي علي كل شـــــــئ

    مع إن – عجبي – كل شئ موجود

    عجبي !!!


    جالك اوان وعرفت مشي الجنايــــــــز

    كيف شفتها يا عبد رب اللذايــــــــــــذ

    قال : شفت شيل بالحيل فقير أو اميـــر

    كما شالوا في الخمامير فواضي القزايز

    عجبي !!


    أنا كنت شئ و صبحت شئ ثم شــئ

    شوف ربنا .. قادرعلي كل شـــــــئ

    هز الشجر شواشيه ووشوشني قال :

    لابد ما يموت شئ عشان يحيا شئ

    عجبي !!


    يا مشرط الجراح أمانة علـــــــــــيك

    و انت ف حشايا تبص من حواليــك

    فيه نقطة سوده في قلبي بدأت تبان

    شيلها كمان .. و الفضل يرجع إليك

    عجبي !!!


    كيف شفت قلبي و النبي يا طبيــــــــــــب

    همد و مات و الا سامع له دبيـــــــــــــب

    قاللي لقيته مختنق بالدمـــــــــــــــــــــوع

    و ما لوش دوا غير لمسه من إيد حبيب

    عجبي !!!!


    تسلم يا غصن الخوخ يا عود الحطـــــــــب

    بييجي الربيع .. تطلـــــــــــع زهورك عجب

    و انا ليه بيمضـــــــــــي ربيع وييجي ربيع

    و لسه برضك قلــــــــــــــــــبي حتة خشب

    عجبي !!!


    قلبي عليل يا ناس و في الكاس دواه

    مديت له إيدي شربت م اللي حــــواه

    جنبي الشمال خف .. اليمين اتــــوجع

    و إيه يداوي الكبد م اللي كـــــــــــواه

    عجبي!!


    .. دي مزكرات و كتبتها من ســـــــــنين

    في نوتة زرقا لون بحور الحنيــــــــــــن

    عترت فيها .. رميتها في المهمـــــــلات

    وقلت صحيح أما صحيح كلام مخبولين

    عجبي !!


    دخل الشتا وقفل البيبان ع البـــيوت

    وجعل شعاع الشمس خيط عنكبوت

    وحاجات كتير بتموت في ليل الشــتا

    لكن حاجات أكتر بترفض تمــــــوت

    عجبي !!


    - الدنيا من غير الربيع مــــــــيته

    ورقة شجر ضعفـــــــانه و مـــفـــــتــته

    - لا يا جدع غلطان تأمل وشوف

    زهر الشتا طالع فــــــــي عز الشـــــتا

    عجبي !!!


    ياللي انت بيتك قش مفروش بريش

    تقوي عليه الريح .. يصبح ما فيش

    عجبي عليك حواليك مخالب كـــــبار

    و ما لكش غير منقار و قادر تعيش

    عجبي !!!!


    سمعت نقطة ميه جوه المحيـــــــط

    بتقول لنقطه ما تنزليش في الغويط

    أخاف عليكي م الغرق .. قلـــــت أنا

    ده اللي يخاف م الوعد يبقي عبيط

    عجبي !!!


    بحر الحياه مليان بغرقي الحياه

    صرخت خش الموج في حلقي ملاه

    قارب نجاه .. صرخت قالوا مفيش

    غير بس هو الحب قارب نجاه

    عجبي !!!


    فارس وحيد جوه الدروع الحديد

    رفرف عليه عصفور وقال له نشيد

    منين .. منين.. و لفين لفين يا جدع

    قال من بعيد و لسه رايح بعيد

    عجبي !!


    كان فيه قمر كأنه فرخ الحمام

    علي صغره دق شعاع شق الغمام

    أنا كنت حاضر قلت له ينصرك

    إشحال لما حتبقي بدر التمام

    عجبي !!


    النهد زي الفهد نط اندلع

    قلبي انهبش بين الضلوع و انخلع

    ياللي نهيت البنت عن فعلها

    قول للطبيعة كمان تبطل دلع

    عجبي !!!


    صوتك يا بنت الإيه كأنه بدن

    يرقص يزيح الهم يمحي الشجن

    يا حلوتي و بدنك كأنه كلام

    كلام فلاسفه سكروا نسيوا الزمن

    عجبي !!!!







    .

      Current date/time is Sun Oct 22, 2017 10:44 am